राष्ट्रिय मुक्ति पार्टी नेपालको घोषणापत्र सार्वजनिक
सारांश
- राष्ट्रिय मुक्ति पार्टी, नेपालले आगामी फागुन २१ गते हुने प्रतिनिधिसभा निर्वाचनका लागि आफ्नो चुनावी घोषणापत्र सार्वजनिक गरेको छ ।
- पार्टी अध्यक्ष राजेन्द्र महतोले ‘स्वदेशवादीको आह्वान, जाँतो छापमा मतदान’ नारासहित घोषणापत्र सार्वजनिक गर्नुभएको हो ।
- “नयाँ नेपाल–साझा नेपाल” निर्माणको संकल्पसहित सार्वजनिक गरिएको घोषणापत्रमा वर्तमान राज्य व्यवस्था, संविधान २०७२ र परम्परागत दलहरूप्रति कडा आलोचना गरिएको छ ।
राष्ट्रिय मुक्ति पार्टी, नेपालले आगामी फागुन २१ गते हुने प्रतिनिधिसभा निर्वाचनका लागि आफ्नो चुनावी घोषणापत्र सार्वजनिक गरेको छ । पार्टी अध्यक्ष राजेन्द्र महतोले ‘स्वदेशवादीको आह्वान, जाँतो छापमा मतदान’ नारासहित घोषणापत्र सार्वजनिक गर्नुभएको हो ।
“नयाँ नेपाल–साझा नेपाल” निर्माणको संकल्पसहित सार्वजनिक गरिएको घोषणापत्रमा वर्तमान राज्य व्यवस्था, संविधान २०७२ र परम्परागत दलहरूप्रति कडा आलोचना गरिएको छ । पार्टीले नेपाल बहुल–राष्ट्रिय समाज भएको उल्लेख गर्दै एकल राष्ट्रवादी संरचनाले उत्पीडित समुदायको अधिकार कुण्ठित गरेको दाबी गरेको छ ।
घोषणापत्रमा संविधानको पूर्ण पुर्नलेखन गरी बहुल–राष्ट्रिय संघीय लोकतान्त्रिक गणतन्त्र स्थापना गर्ने प्रस्ताव गरिएको छ । सबै आदिवासी, जनजाति, मधेशी, दलित, पिछडा वर्ग तथा अल्पसंख्यक समुदायलाई आत्मनिर्णय, स्वायत्तता र समानुपातिक प्रतिनिधित्वको ग्यारेन्टी गरिने उल्लेख छ ।
पार्टीले एकल राष्ट्रवादको अन्त्य गर्दै साझा राज्य संरचना निर्माण गर्ने, परम्परागत स्वशासन प्रणालीलाई कानुनी मान्यता दिने तथा ग्राम स्वराजमार्फत स्थानीय स्वशासन सुदृढ गर्ने नीति अघि सारेको छ ।
आर्थिक क्षेत्रमा सामुदायिक भूमि र स्रोत स्वामित्व लागू गरी आर्थिक विषमता घटाउने योजना घोषणापत्रमा समावेश गरिएको छ । सहकारी मोडेलमा आधारित उत्पादन र वितरण प्रणाली, न्यूनतम पारिश्रमिक र सामाजिक सुरक्षाको ग्यारेन्टी, महिलाको सम्पत्तिमा समान अधिकार, श्रमिक अधिकारको संरक्षण तथा जलविद्युत, खानी र वन स्रोतमा स्थानीय समुदायको पहिलो हक सुनिश्चित गरिने प्रतिबद्धता व्यक्त गरिएको छ ।
पार्टीले आगामी १० वर्षभित्र नेपालको कुल गार्हस्थ उत्पादन (न्म्ए) ४२ अर्ब डलरबाट ५०० अर्ब डलरसम्म पु¥याउने महत्वाकांक्षी लक्ष्य पनि अघि सारेको छ । जलविद्युत, डिजिटल नवप्रवर्तन, कृत्रिम बुद्धिमत्ता (ब्क्ष्), ब्लकचेन प्रविधि तथा स्वदेशी उत्पादनमा आधारित आत्मनिर्भर अर्थतन्त्र निर्माण गर्ने रणनीति प्रस्तुत गरिएको छ ।
घोषणापत्रमा जातीय विभेद, छुवाछुत, लैंगिक, धार्मिक र क्षेत्रीय विभेदको पूर्ण अन्त्य गर्ने नीति उल्लेख छ । जातीय श्रेणीविहीन समाज निर्माण गर्ने, दलित उत्पीडनमा संलग्नलाई कडा कारबाही गर्ने तथा राज्यका सबै निकायमा जनसंख्याको अनुपातमा समानुपातिक समावेशिता सुनिश्चित गर्ने प्रतिबद्धता जनाइएको छ ।
महिलालाई सबै क्षेत्रमा ५० प्रतिशत प्रतिनिधित्व, युवालाई रोजगारी र उद्यमशीलताको अवसर, बालअधिकारको प्रभावकारी कार्यान्वयन तथा महिला हिंसाविरुद्ध शून्य सहनशीलता नीति लागू गरिने जनाइएको छ ।
पार्टीले पूर्वीय दर्शन र स्वदेशी ज्ञान प्रणालीमा आधारित शिक्षा नीति लागू गर्ने, आधारभूत तहदेखि योग, ध्यान र आत्मरक्षा तालिमको व्यवस्था गर्ने तथा मातृभाषामा निःशुल्क गुणस्तरीय शिक्षा प्रदान गर्ने नीति अघि सारेको छ । नेपालमा बोलिने सबै मातृभाषालाई संविधानको अनुसूचीमा सूचीकृत गर्ने तथा बहुभाषिक सरकारी कामकाज नीति अवलम्बन गरिने उल्लेख छ ।त्यस्तै स्वच्छ, पारदर्शी र जवाफदेही शासन प्रणाली स्थापना गर्ने प्रतिबद्धतासहित शक्तिशाली जनलोकपाल गठन गर्ने तथा ‘कसैलाई छुट छैन’ नीति अन्तर्गत भ्रष्टाचारविरुद्ध कडा कारबाही गरिने घोषणापत्रमा उल्लेख छ ।
राष्ट्रिय स्वार्थ र स्वाभिमानलाई केन्द्रमा राख्दै भारतसँग विशेष तथा चीनसहित अन्य मुलुकसँग सन्तुलित सम्बन्ध कायम गर्ने नीति पार्टीले अघि सारेको छ । साथै प्लास्टिकमुक्त नेपाल अभियान, हरित अर्थतन्त्र, नवीकरणीय ऊर्जाको प्रवद्र्धन तथा जलवायु न्यायका कार्यक्रम कार्यान्वयन गरिने जनाइएको छ ।
राष्ट्रिय मुक्ति पार्टी नेपाल, नागरिक उन्मुक्ति पार्टी नेपाल र जनता समाजवादी पार्टी एक भएर ‘जाँतो’ चुनाव चिन्ह लिएर निर्वाचनमा सहभागी भएको अध्यक्ष महतोले जानकारी दिनुभयो ।
घोषणापत्रमा ‘स्वदेशवाद–जिन्दाबाद’, ‘उत्पीडित राष्ट्रियताहरू एक हौँ’ लगायतका नाराहरू समावेश गरिएको छ । पार्टीले आफ्नो एक मतले नेपालको नयाँ इतिहास लेख्ने दाबी गर्दै मतदातालाई जाँतो चिन्हमा मतदान गर्न आह्वान गरेको छ ।
कुल कमेन्ट:
0
nepaltathya_news
लेखकबाट थप
यो खबर पढेर तपाईंलाई कस्तो महसुस भयो ?
प्रतिक्रिया