जगमानले पाए राजावादी आन्दोलनको जिम्मा

१७ चैत, काठमाडौं ।

राजसंस्था पुर्नस्थापनाको लागि संयुक्त जनआन्दोलन समितिका संयोजक नवराज सुवेदीले आफ्नो जिम्मेवारी प्रा.डा. जगमान गुरुङलाई सुम्पिएका छन् । घरमै नजरबन्दमा रहेका उनले आज एक  विज्ञप्ति जारी गर्दै गुरुङलाई जिम्मेवारी सुम्पिएको जानकारी गराएका हुन् ।  अब हुने आन्दोलनको नेतृत्व गुरुङले गर्ने अवगत गराउँदै सुवेदीले भनेका छन्,

‘आन्दोलन निरन्तर राख्न सम्बिन्धित सबै दल, संघसंस्थालाई सहयोग गर्न आह्वान गर्दछु ।’ नेपाल प्रज्ञा प्रतिष्ठानका पूर्व उपकुलपति समेत रहेका गुरुङ ‘ऋषि’को रुपमा परिचित छन् । उनी प्राज्ञिक मञ्चका संयोजक पनि हुन् । उनकै संयोजनमा साताअघि पूर्वराजा ज्ञानेन्द्र शाहको गोरखा भ्रमण सम्पन्न भएको थियो ।  अस्ति तिनकुने घटनाको कारण सरकार भने राजवादीहरुमाथि निर्मम बन्ने देखिएको छ ।

एकतातिर निर्मल निवासको सुरक्षा टोली परिवर्तन र १२ सुरक्षाकर्मी कटौती भइरहँदा अघोषित नजरबन्दमा राखिएको चर्चा छ भने राप्रपाका वरिष्ठ उपाध्यक्ष रविन्द्र मिश्र र महामन्त्री धवलशमशेर राणालगायतलाई पक्राउ गरेर हत्या र संगठित अपराधको कसुरमा अनुसन्धान अघि बढाइएको अवस्था छ ।  यता, प्रधानमन्त्री केपी शर्मा ओलीले आज साँझ सर्वदलीय बैठक बोलाउनुभएको छ । बालुवाटारमा बस्ने बैठकमा राजावादीको आन्दोलनले निम्त्याएको घटना र त्यसको नियन्त्रणबारे महत्वपुर्ण छलफल हुने बताइएको छ ।