पत्रकार दिलभूषण पक्राउका लागि जारी पुर्जीविरुद्ध परेको मुद्दामा सुनुवाइ सकियो, आदेश आउँदै

२ असार, काठमाडौं । 

पत्रकार दिलभूषण पाठकविरुद्ध जारी भएको पक्राउ पुर्जीविरुद्धको मुद्दामा सुनुवाइ सकिएको छ। विद्युतीय अपराध ऐनविपरीतको कसुरमा पत्रकार पाठकलाई पक्राउ गर्ने तयारीविरुद्ध उच्च अदालत, पाटनमा परेको निवेदनमाथि सोमबार (आज) सुनुवाइ सकिएको हो। निवेदनमाथि अदालतका न्यायाधीश ऋषिराज भण्डारीको इजलासमा सुनुवाइ सकाएको हो।

पाठकले काठमाडौंको पाँचतारे हिल्टन होटलसँग सम्बन्धित एक भिडियो सामग्री बनाएका थिए। त्यसविरुद्ध प्रहरीको साइबर ब्यूरोमा उजुरी परेको थियो। त्यसपछि प्रहरीले विद्युतीय अपराध ऐनको दफा ४७ अन्तर्गतको कसुरमा पाठकलाई पक्राउ गर्न जिल्ला अदालत, काठमाडौंबाट अनुमति लिएको थियो। त्यसविरुद्ध पाठकका तर्फबाट उच्च अदालत, पाटनमा निवेदन परेको थियो। उक्त निवेदनमा सुनुवाइ सकिएको हो। आदेश आउन भने बाँकी छ। निवेदनमा गृह मन्त्रालय, प्रहरी प्रधान कार्यालय र साइबर ब्यूरोलाई विपक्षी बनाइएको छ।