नक्कली सवारी दर्ता गरेको आरोपमा एक युवक जेल चलान

२० चैत, सप्तरी ।

यातायात व्यवस्था कार्यालयमा सुकुटी र मोटरसाइकलको सवारी दर्ता र नवीकरण गर्ने काम नक्कली गरेको आरोपमा एक युवा जेल चलान भएका छन् । मधेस प्रदेश, सप्तरीको राजविराज नगरपालिका ३ हनुमान चौक घर भई उदयपुरको त्रियुगा नगरपालिका ११ पुरानो गाईघाट बस्दै आएका ३२ वर्षीय विवेक थापा मगर लिखत सम्बन्धी कसूर आरोपमा पक्राउ परेका थिए ।

गत फागुन २० गते जिल्ला प्रहरी कार्यालय उदयपुरले  उनलाई नियन्त्रणमा लिएर अनुसन्धान गरिरहेको थियो । अनुसन्धानको क्रममा उदयपुर र खोटाङका केही व्यक्तिबाट सवारी दर्ता किताब नवीकरण गरिदिने भनी सवारी दर्ता किताब र नगदसमेत लिएको प्रमाणित भएपछि उनी जेल गएका हुन् । उनीमाथि उदयपुर र खोटाङ जिल्लाका केही व्यक्तिहरुलाई मोटरसाइकल, स्कुटरको सवारी दर्ता किताब र बिमा नवीकरण गरिदिने आश्वासन दिलाई झुट्टा लिखत बनाएको आरोप लागेको थियो ।

झुट्टा लिखतमा जाहेरी दरखास्त परेपछि पक्राउ मगरले यातायात व्यवस्था सेवा कार्यालय गाईघाटको सहीछापको झुट्टा लिखत बनाएको समेत अनुसन्धानबाट खुलेको जिल्ला प्रहरी कार्यालयका सूचना अधिकारी डिएसपी केदारमान दोङले बताए । प्रहरी अनुसन्धान रिपोर्ट उदयपुर जिल्ला अदालतमा पेश गरेकोमा अदालतको चैत १९ को फैसलाले लिखत सम्बन्धी कसुरमा मगरलाई पुर्पक्षको लागि थुनामा राख्ने आदेश दिएको हो । अदालतको आदेश अनुसार मगरलाई मङ्गलबार जिल्ला कारागार पठाइएको डिएसपी दोङले बताएका छन् ।