छुट्टी मनाउन आइसल्यान्ड गएका प्रहरीको कार दुर्घटनामा मृत्यु

९ असोज ,छुट्टी मनाउन आइसल्यान्ड गएका हङकङ प्रहरी अधिकारीको कार दुर्घटनामा निधन भएको छ।

उनी श्रीमतीसहित बिदा मनाउन आइसल्यान्ड पुगेका थिए। उनकी श्रीमती पनि हङकङको प्रहरी सेवामै छिन्। स्रोतले दिएको जानकारीअनुसार दम्पतीले त्यहाँ कार भाडामा लिएका थिए र दुर्घटना हुँदा दुवै जना कारमा थिए। जसमध्ये श्रीमान्‌को मृत्यु भयो भने श्रीमती गम्भीर घाइते भएकी छन्। घटनाको बेला कार कसले चलाएको थियो भन्ने खुलेको छैन।

मृतक प्रहरीको मरिन नर्थ डिभिजनमा कार्यरत थिए भने उनकी श्रीमती हार्बर डिभिजनमा कार्यरत छन्। घटनाको विस्तृत विवरणका लागि प्रहरीसँग सम्पर्क गर्ने कार्य भइरहेको एससीएमपीले जनाएको छ। आइसल्याण्ड एक नर्डिक टापु राष्ट्र हो। नर्डिक देशहरू उत्तरी युरोप र उत्तरी एट्लान्टिकको भौगोलिक र सांस्कृतिक क्षेत्र हुन्। यसमा डेनमार्क, फिनल्याण्ड, आइसल्यान्ड, नर्वे र स्वीडेनका सार्वभौम राज्य लगायत समावेश छन्।