बालेन शाह र सुदन गुरूङविरूद्ध चितवनमा युवा संघको जाहेरी

३० असोज, काठमाडौं।

राष्ट्रिय युवा संघ नेपालले काठमाडौंका मेयर बालेन शाह र हामी नेपाल संस्थाका प्रमुख सुदन गुरूङविरूद्ध जिल्ला प्रहरी कार्यालय चितवनमा जाहेरी दिएको छ। शाह र गुरूङले जेनजी आन्दोलनको दुरूपयोग गरी निजी र सरकारी भवनहरू ध्वस्त बनाउन भूमिका खेलेको भन्दै नेकपा एमालेको युवा संगठन राष्ट्रिय युवा संघ चितवनले प्रहरीमा जाहेरी दिएको हो।संघका जिल्ला संयोजक मधुपर्क श्रेष्ठले शाह र गुरूङविरूद्ध आपराधिक उपद्रव मुद्दामा जाहेरी दिएको बताए। जाहेरीमा जेनजी आन्दोलनको दुरूपयोग गरेर चितवनमा नेकपा एमालेका २ दर्जन बढी नेताहरूको घरमा तोडफोड र आगजनी गरिएको उल्लेख छ।

जिल्ला, तीन नगर, एक वडा र पार्टी सम्बद्ध अन्य धेरै कार्यालयमा तोडफोड र आगजनी गरिएको जाहेरीमा उल्लेख छ।  ‘शाह, गुरूङ समेतको नेतृत्वमा दर्जनौं मानिसहरूको संलग्नतामा जेनजी आन्दोलन दुरूपयोग गरेर पार्टी र सरकारी भौतिक संरचनाहरू ध्वस्त पारिएको छ,’ जाहेरीमा उल्लेख छ। यसअघि अनेरास्ववियु चितवनले पनि जिल्ला प्रहरीमा शाह र गुरूङविरूद्ध जाहेरी दिएको थियो। जिल्ला प्रहरी कार्यालयका प्रवक्ता डिएसपी रवीन्द्र खनालले जाहेरी दर्ता गर्ने विषयमा तालुकको निकायसँग समन्वय गरिने बताए।