गुण्डुमा एमालेको सचिवालय बैठक सुरु

यसअघि आइतबारका लागि तय गरिएको बैठक, अविरल वर्षासँगै आएको बाढी, पहिरो र डुबानका कारण स्थगित गरिएको थियो । एमाले केन्द्रीय कार्यालयका सचिव डा. भीष्म अधिकारीका अनुसार, आजको बैठकले पार्टीको आगामी रणनीति तथा नयाँ कार्यदिशा तय गर्नेछ । जेनजी प्रदर्शनपछि दलहरूमा नेतृत्व परिवर्तन र पुस्तान्तरणको बहस चर्किँदै गएको छ । तर, एमालेमा भने संस्थापन पक्ष खुलेरै अध्यक्ष ओलीको बचाउमा उत्रिएका छन् । एमाले भक्तपुर जिल्ला कमिटीले बिहीबार गुण्डुमा आयोजना गरेको कार्यक्रममा पूर्वप्रधानमन्त्री समेत रहेका अध्यक्ष ओलीले अन्तरिम सरकारको कार्यशैलीप्रति असन्तुष्टि पोखेका थिए ।

उनले एमाले प्रतिनिधि सभा विघटनको विपक्षमा उभिने भन्दै पुर्नस्थापनाको पहल गर्ने उद्घोष गरेका थिए । भदौ २३ र २४ गते भएको जेनजी प्रदर्शनका क्रममा बालकोटमा रहेको ओलीको निजी निवासमा आगजनी भएको थियो । २४ भदौदेखि नेपाली सेनाको सुरक्षा घेरामा बसेका ओली स्थिति सामान्य बन्दै गएपछि गुण्डुमा भाडाको घरमा बस्दै आएका छन् । एमालेको भातृ संगठन युवा संघले भोलि शनिबार काठमाडौंमा शक्ति प्रदर्शन गर्न मोटरसाइकल र्याली समेत आह्वान गरेको छ ।