मधेशमा योजना खरिद बिक्रीको छानबिन गर्न विशेष समिति गठन

२२ जेठ, जनकपुरधाम ।

मधेश प्रदेशमा चालू आर्थिक वर्षको योजना खरिदबिक्री भएको आरोप लागेपछि प्रतिपक्षी दलको दबाबमा सरकार छानविन गर्न तयार भएको छ । सत्तारुढ र प्रतिपक्षी दलको सहमतिअनुसार आजको प्रदेशसभा बैठकमा सभामुख रामचन्द्र मण्डलले संसदीय छानविन विशेष समिति घोषणा गरेका हुन् । उनले विकास योजना तथा कार्यक्रम सम्बन्धमा संसदमा कुरा उठेकाले समिति बनाएको जानकारी दिए ।

उनका अनुसार समितिमा साँसदहरु केशव राय, कुमरकान्त झा, किरण कुमारी, शम्भु कुमार साह, रहबर अन्सारी, रमिता प्रधान, कनिष्क पटेल, उर्मिलादेवी सिंह, कञ्चन विच्छा र विमला अन्सारीलाई राखिएको छ । चालू आर्थिक वर्षमा मन्त्रीहरुले सचिवालयमार्फत् दलाललाई योजना बेचेको भन्दै प्रतिपक्षी जसपा नेपाल र नेकपा माओवादी केन्द्रले पटक पटक संसद अवरुद्ध गरेको थियो । तर छानविन गर्न सरकार आनाकानी गर्दै आएको थियो । सभामुख रामचन्द्र मण्डलले समिति गठनका लागि रुलिङ गरेको झण्डै दुई महिना वित्दा पनि नगरेको भन्दै बुधवार बसेको प्रदेशसभा बैठक पनि प्रतिपक्षी दलले अबरुद्ध गरेको थियो ।