भ्रमणबाट फर्किँदा दुर्घटना, डिस्चार्जपछि झुन्डिएको अवस्थमा फेला

२८ चैत, हेटौंडा ।

मकवानपुरको बकैया गाउँपालिकामा बुधबार राति दुर्घटनामा परी घाइते भएका व्यक्ति कोठामा झुन्डिएको अवस्थामा फेला परेका छन् । हेटौंडा अस्पतालबाट आज बिहान करिब ३ बजे डिस्चार्ज भएका विमल ढुंगाना राति सुतेको कोठामै झुन्डिएको अवस्थामा फेला परेका हुन् । ढुंगाना अस्पतालबाट डिस्चार्ज भएपछि हेटौंडा–११ नवलपुरस्थित भीमफेदी गाउँपालिका–९ का वडा सदस्य उदयप्रसाद हटवालको घरमा बास बसेका थिए ।

बिहान अबेरसम्म नउठेपछि झयालबाट हेर्दा ढुंगाना झुन्डिएको अवस्थामा देखिएपछि हटवालले प्रहरीलाई खबर गरेका थिए । प्रहरीका अनुसार ढुंगाना खादा र टाइको डोरीमा झुन्डिएको अवस्थामा फेला परेका थिए । पाइन्टमा लगाउने पेटी भने चुँडिएको अवस्थामा प्रहरीले बरामद गरेको छ । पेटीलाई पासो बनाउन खोज्दा चुँडिएको हुन सक्ने अनुमान प्रहरीको छ । भीमफेदी गाउँपालिकाको कृषि तथा पशु सेवा शाखाले अगुवा कृषकहरूलाई पूर्वीनेपालको भ्रमण सकेर फर्किँदै गर्दा बाप्र ०६–००१ ख ०२७० नम्बरको बस पूर्वी मकवानपुरको बकैया गाउँपालिका–३ चिसापानी स्थित मदन भण्डारी मार्ग (धरान–चतरा सडक खण्ड) को मोडमा दुर्घटनामा परेको थियो । पशु विकास शाखाका प्राविधिक कर्मचारी समेत रहेका ढुंगाना दुर्घटनामा परेर सामान्य घाइते भएका थिए ।