रोल्पाबाट प्रचण्ड र वर्षमान उम्मेदवार सिफारिस, समानुपातिकतर्फ महरा

११ पुस, काठमाडौं ।

नेकपा माओवादीका संयोजक पुष्पकमल दाहाल प्रचण्ड रोल्पाबाट उम्मेदवार सिफारिस भएको छ। प्रचण्डलाई एक नम्बरमा राखेर प्रत्यक्षतर्फ ५ जनाको नाम सिफारिस गरिएको हो। प्रचण्डपछि वर्षमान पुन, कुलप्रसाद केसी, जयपुरी घर्ती र दीपक रोकालाई उम्मेदवार सिफारिस गरिएको छ। गएको निर्वाचनमा यो क्षेत्रमा वर्षमान पुनले जितेका थिए।

प्रचण्ड ०६४ को पहिलो संविधानसभा निर्वाचनमा पनि यहीबाट निर्वाचित भएका छन्। रोल्पाबाट समानुपातिकतर्फ कृष्णबहादुर महरा, पवित्रा धर्ती, गीता नेपाली र बाबुलाल पुन सिफारिस भएका छन्। गएको निर्वाचनमा गोरखा २ बाट निर्वाचित भएका प्रचण्ड फागुन २१ को निर्वाचनमा कहाँबाट लड्ने निश्चित भएको छैन। प्रचण्ड अहिलेसम्म रोल्पासहित कास्की, सुनसरी, गोरखा, महत्तरीलगायतबाट पनि उम्मेदवारको रूपमा सिफारिस भएका छन्।