फेरि सडकमा उत्रिने घोषणा गर्दै दुर्गा प्रसाईंले भने, सरकारबाट १५ चैतको जस्तो दमन नहोस्

२२ भदौ, काठमाडौं । 

विवादित मेडिकल व्यवसायी दुर्गा प्रसाईंले फेरि सडकमा उत्रिनेघोषणा गरेका छन् । उनले जेन–जीले सुरु गरेको भ्रष्टाचारविरुद्धको अभियानलाई समर्थन जनाउँदै आन्दोलनमा सहभागी हुने बताएका हुन् । नेताका सन्तानको विलासी जीवनशैलीको विरोधका जेन–जीहरूले भोलि संसद भवनअगाडि विरोध प्रदर्शन घोषणा गरेका छन् । प्रसाईंले उक्त प्रदर्शनमा सरिक हुने बताएका छन् ।

उनले जेन–जी अहिले सुरु गरेको यो अभियानलाई आफूले तीन वर्षअगाडि उठाएको मुद्दासँग मिलेको बताएका छन् । उनले भनेका छन्, ‘तीन वर्षअघि हामीले उठाएको आवाजलाई आज फेसबुक, टिकटकदेखि सम्पूर्ण सञ्चार जगत्‌ले पुनः दोहोर्‍याएको छ, धन्यवाद सबैलाई ।’

त्यस्तै, उनले आन्दोलनलाई दमन नगर्न सरकारसमक्ष अनुरोध गरेका छन् । प्रसाईं गत १५ चैतमा तीनकुनेमा भएको राजावादीहरूको आन्दोलनमा उग्रता मच्चाएर भाग्ने क्रममा भारतबाट पक्राउ परेका थिए । उक्त मुद्दामा धरौटीमा रिहा भएका प्रसाईं पहिलोपटक सडकमा आउन लागेका हुन् ।