वुमन्स डे कपमा नेपाल आज युगान्डासँग खेल्दै

२५ फागुन, युगान्डामा जारी चार देशीय महिला टी–२० आई सिरिज अन्तर्गत नेपालले आफ्नो दोस्रो खेल आइतबार घरेलु टोली युगान्डासँग खेल्दै छ । नेपालको खेल दिउँसो पौने १ बजेदेखि युगान्डाको एन्टेब्बे क्रिकेट ओभल मैदानमा सुरु हुनेछ ।  हिजो भएको पहिलो खेलमा नेपाल नामिबियासँग ६ विकेटले पराजित भएको थियो ।

नेपालले दिएको ९३ रनको लक्ष्य पछ्याइरहने क्रममा वर्षाले केही समय अवरोध भएपछि खेललाई ‘डिएलएस’ विधिबाट १५ ओभरमा झारिएको थियो ।  खेललाई १५ ओभरमा झारिएपछि लक्ष्य ७१ रनको बनेको थियो। नामिबियाले १४ दशमलव पाँच ओभरमा चार विकेट गुमाउँदै उक्त लक्ष्य पूरा गरेको हो । त्यसअघि ‘टस’ जितेर पहिला ‘ब्याटिङ’ गरेको नेपाली महिला टोलीले निर्धारित २० ओभरमा १० विकेट गुमाउँदै ९२ रन बनाएको थियो ।   नेपालले फागुन २६ गते हङकङसँग, फागुन २८ गते नामिबियासँग, फागुन २९ गते युगान्डासँग र आगामी चैत १ गते हङकङसँग खेल्नेछ ।